На Клиниката за гинекологија и акушерство (ГАК) во Скопје доцна синоќа, во 22 часот, почина пациентка на возраст од 37 години од Охрид, родилка која вчера попладне е донесена во Скопје со возило на брза помош во високо фебрилна состојба (телесна температура над 39 степени) и со мртов плод.

Како што соопштуваат од ГАК, на жената уште веднаш ѝ е направена целосна лабораторија и земен брис за ковид-19.

Лекарите оперативно го извадија плодот, а од стомакот на мајката е евакуиран гној. Можна причина за фебрилноста е септичната состојба на пациентката, но тестот треба да утврди или отфли присуство на коронавирус. За време на интервенцијата состојбата кај пациентката се влоши при што таа беше интубирана, се пристапи кон целосна реанимација, но, за жал. во 22 часот е констатирана смрт. Причина за смртта најверојатно е сепса со масивна тромбоемболија, а пациентката ќе биде пратена на обдукција по што ќе има егзактна дијагноза. Се работи за екстремно обезна пациентка, со телесна тежина од околу 150 кг, со висок крвен притисок и тахикардија, која во последните 5 месеци воопшто не се движела, а согласно податоците оддокторите во Охрид, пациентката не ги извршувала ни потребните гинеколошки контроли, се вели во соопштението на ГАК.

Починатата родилка била донесена на Клиниката за гинекологија и акушерство-Скопје со амбулантно возило од ОБ Охрид, без претходна најава. По измерената телесна температура, таа била веднаш спроведена на посебен влез до одделението за изолација на клиниката.

Од ГАК еден дел од Клиниката функционира за родилки суспектни и позитивни на Ковид-19.

За таа намена е воспоставен целосен протокол на изолација од влез, патека на движење, посебна родилна сала, бокс и тим, додаваат од ГАК.

Од Клиниката објаснуват дека на 30. март 2020 година е примена второротка од Куманово на возраст од 27 години која во 20:15 часот поради намалена плодова вода и знаци за фетално страдание е породена со царски рез. Пациентката е спроведена и породена во изолација, заради фактот што таа како суспектна на Ковид-19 и упатна дијагноза која укажува на намалената плодова вода e најавена и испратена на Клиниката преку својот матичен лекар.

На пациентката освен комплетната лабораторија, земен и е и брис за Ковид-19 чиј што резултат е стигнат на 31.03.2020, попладне во 18 часот и истиот е позитивен на вирусот. Пациентката роди живо машко новороденче кое е недоносено и во моментов се наоѓа на одделот за интезнивна нега и терапија на ГАК. Новороденчето е изолирано и е во добра општа состојба, не е на респиратоена машина туку само е со кислородна хауба. Денеска на бебето ќе му биде земен брис и ќе му биде направен тест на Ковид-19, велат од ГАК.

Пациентката при приемот немала покачена температура, но во својот исказ посочила дека пред три дена имала треска и се пожалила на сува кашлица.

Пациентката укажа и на тоа дека член на семејството има симптоми кои може да укажуваат на инфекција со Ковид -19. Со пациентката е постапено според сите протоколи за прием на заразен пациент како во однос на нега и третман, така и во однос на адекватна заштита на персоналот и изолација на пациентот. На 31.03.2020 родилката почна да развива потешка клиничка слика, отежнато дишење со намалена сатурација, по што е веднаш префрлена и хоспитализирана на Клиниката за инфективни болести и фебрилни состојби, велат од Координативното кризно тело на ЈЗУ УГАК

Оттаму истакнуваат уште еднаш дека во текот на целокупниот престој на пациентката на Клиниката за гинекологија и акушерство, од приемот до исписот, со неа е постапувано според сите начела за превенција и заштита од Ковид-19, како во поглед на изолацијта на пациентката така и во однос на преземените мерки за заштита на медицинскиот персонал и останатите пациенти.

Од Клиниката за гинекологија и акушерство апелираме уште еднаш сите пациентки кои доѓаат на клиниката да се придржуваат кон сите насоки дадени од Министерството за здравство во однос на заштитата на сопственото здравје и здравјето на околината, но исто така се упатува и апел за целосно и вистинито давање на информации при прием со цел соодветно и навремено преземање на мерките кои се однесуваат на заштитата на вашето здравје, здравјето на вашето бебе и безбедноста на здравстевниот персонал.

 

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.