Републички совет за безбедност во сообраќајот и патиштата (РСБСП) апелира до возачите да возат смирено и безбедно и да ги почитуваат правилата за ограничување на брзината.

Од РСБСП потенцираат дека брзината е критичен и клучен фактор во сите сообраќајни незгоди и може да се каже дека токму од брзината зависи дали ќе се случи одредена сообраќајна незгода и какви ќе бидат последиците од сообраќајната незгода.

Според статистичките податоци брзото возење, односно неодговорното однесување во сообраќајот и понатаму останува главна причина за предизвикување на сообраќајни незгоди со фатални последици. Во 2018 година, во Република Mакедонија, 43 лица го загубиле животот во сообраќајни незгоди предизвикани од брзо возење, а 1069 лице се здобиле со тешки и сериозни повреди како последица на брзото возење.

За жал, и покрај тоа, истражувањата покажуваат дека 86 отсто од возачите во Република Македонија барем еднаш ги имаат прекршено правилата за ограничување на брзината, а 20 отсто од нив, тоа го прават често.

Водејки се од тоа, Републичкиот совет за безбедност на сообраќајот на патиштата ги потсетува возачите дека се должни да ја прилагодат брзината според условите во кои се одвива сообраќајот и според состојбата на патот, а брзината на движење е ограничена согласно условите на патот и истата е одбележена со соодветен сообраќаен знак.

Потсетуваат дека брзината на движење, на патиштата во Република Македонија, е ограничена и тоа на 130 км/час на автопат, на 110 км/час на пат резервиран за моторни возила, на 90 км/час на останатите патишта, а најголема дозволена брзина во населено место е 50 км/час.

Брзото возење ја загрозува безбедноста во сообраќајот и се санкционира со парична казна до 400 евра во денарска противвредност, во зависност од тежината на сторениот прекршок, односно од големината на пречекорувањето на брзината. Брзото возење претставува закана за времено одземање на возачката дозвола до 12 месеци, ве прави нервозни и агресиви, а агресивните и брзи возачи немаат можност да уживаат во возењето и се соочуваат со голем број на стресни ситуации додека возат.

Брзото возење значи поголема потрошувачка на гориво и негрижа за возилото, изнудува грешки кои најчесто завршуваат со фатални последици кои се трајни и ненадоместливи.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.