До крајот на денов бранот врнежи што попладнево ги зафати северозападните делови од земјата, ќе се прошири насекаде. УХМР најавува дека во западните и југозападните делови се очекуваат пообилни и повремено поројни врнежи, локално над 20 литри на метар квадратен за 12 часа. На планините на северозапад ќе врне снег. Ќе дува умерен, повремено засилен ветер од југоисточен правец.

Според УХМР, на повисоките планини веќе врне снег, додека на повеќе места дува умерен, а на места долж Повардарието засилен ветер од југоисточен правец.

Висината на снежната покривка до 16 часот е 35 сантиметри на Попова Шапка, 13 во Лазарополе и 9 во Маврови Анови.

Времето утре ќе биде променливо облачно со повремен локален дожд со послаб интензитет, на планините во западните делови со повремен снег. Ќе дува слаб до умерен ветер од јужен правец. Минималната температура ќе биде во интервал од 2 до 7, а максималната ќе достигне од 9 до 16 степени Целзиусови.

Во Скопје променливо облачно со слаб до умерен јужен ветер. Минималната температура ќе се спушти до 4, а максималната ќе достигне 13 степени Целзиусови.

Во вторник ќе преовладува облачно време, на места со слаби врнежи од дожд. Од среда следува период на стабилно време со натпросечни дневни температури и со услови за магла по одделни котлини.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.