Неколку десетина навивачи на фудбалската репрезентација на Аргентина се собраа во Доха пред часовникот, кој денеска означи 11 денови до почетокот на Мундијалот во Катар.

Облечени во дресови на репрезентацијата, навивачите пееја и се фотографираа со големо аргентинско знаме, по што им посакаа добредојде на четворица свои сонародници, кои пристигнаа во Катар од Јужна Африка со велосипеди.

Четворицата аргентински навивачи – Леонардо Бланко, Матијас Виљароел, Силвио Гати и Лукас Ледезма, на патот до Катар долг 10.500 километри тргнаа со велосипеди на 15 мај.

Нè мотивираше нашиот сон… на 18 декември да ја видиме Аргентина и Лео Меси како го подигнуваат трофејот, порача Бланко.

Меси, кому ова ќе му биде последен Мундијал во кариерата, ќе ја предводи Аргентина на Светското првенство во Катар кое стартува на 20 ноември, а Гаучосите се во група со Саудиска Арабија, Мексико и Полска.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.