Поројни дождови и силен ветер го зафати поголемиот дел од Македонија, а невремето направи вистински хаос во Преспа.

Голем број на корисници на социјалните мрежи објавуваа фотографии и видеа од силното невреме.

Ова се случи пред половина час во Преспа! Ништо не е поубаво но и пострашно од природата во исто време! Боже, колку многу „природа“, напиша режисерот Јани Бојаџи под неговото видео.

Не ми се верува на што бев сведок, пишува друг корисник, споделувајќи видео од Крани.

Според градоначалникот на општина Ресен, Живко Гошаревски, кој во моментот со службите е на терен, предизвикана е голема материјална штета, отсечени се села, но нема човечки жртви ниту повредени.

Во моментот сме на терен со екипи на „Македонија пат“ и Противпожарната служба, работиме на расчистување на патиштата, а во постојана комуникација сме и со медицинските тимови на Брзата помош. Силното невреме, какво не паметат постарите преспани предизвика голема материјална штета. Отсечени беа села, откорнати дрјва, кровови на куќи, срушени бандери… Во моментов нема струја, но најбитно е што нема повредени и жртви, изјави Гошаревски за МИА.

Невремето кое траело околу половина час ги уништило и земјоделските култури, а најголеми штети имало во селата кои гравитираат кон граничниот премин „Маркова нога“: Штрбово, Наколец, Крани, Долно Дупени и Љубојно.

Локалните служби, како што информира Гошаревски, се на терен, а информирани се и сите национални институции и ресорните министерства.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.