Потпретседателот на косовската Влада во оставка Енвер Хоџај вели дека новиот граничен премин меѓу Косово и Македонија, Белановце – Станчиќ, ќе биде пуштен во употреба во текот на овој викенд, јави дописникот на МИА од Приштина.

Во објава на својата страница на „Фејсбук“, Хоџај за заслугите за отворање на преминот им се заблагодари на надлежните косовски институции и на македонската влада.

По многу години одлагање и одолговлекување, среќен сум што заедничката гранична точка Станчиќ – Белановце е готова и ќе се отвори овој викенд за граѓаните. Благодарност до Државната комисија на Косово за одбележување и одржување на границата и на другите институции за соработката и на македонската Влада за тоа што во една година, благодарение на политичката волја, се заврши овој проект, кој со години беше блокиран, напиша Хоџај.

Граничниот премин Белановце – Станчиќ, кој ги поврзува кумановскиот регион во Македонија со гњиланскиот во Косово, се изгради со финансии од ИПА програмата на Европската унија.

Иницијативата за отворање на граничниот премин потекнува од 2011 година, а неговата изградба започна во јуни 2018 година, кога беше поставен камен темелникот од страна на вицепремиерите на двете земји, Бујар Османи и Енвер Хоџај, и амбасадорот на ЕУ во Скопје, Самуел Жбогар.

Жителите од кумановскиот и гњиланскиот регион досега се жалеа поради нереализацијата на проектот, затоа што, како што велат, беа принудувани да патуваат и по сто километри за, преку граничниот премин Блаце, да стасаат до местата на другата страна на границата, кои се инаку многу блиску едно до друго

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.