Сестрите Садат и нивната мајка, штотуку венчаниот пар Араш Пурзараби и Пуне Гурџи, сопружниците Евин Арслани и Хива Молани и нивната едногодишна ќерка се само неколкумина од 176-те патници и членови на екипажот на украинскиот боинг кој беше соборен во средата во Иран.

Утрово Иран ја презеде одговорноста за трагедијата. Официјално, авионот бил соборен со „човечка грешка во момент на криза предизвикана од американскиот авантуризам кој доведе до катастрофа“.

Семејствата и пријателите на социјалните мрежи се збогуваат од најблиските.

Сара и Саба Садат и нивната мајка Шекуфе

Во 2019 година Сара дипломирала на Универзитетот во Алберта и пиишувала докторат. Била во посета на роднини во Иран.

Сара планираше да започне програма за клиничка психологија на нашиот универзитет по враќањето во Сан Диего напролет. Сите сме погодени од трагедијата што опфати многу семејства и сакаме да ги поддржиме во најтешките времиња, велат од Универзитетот во Алберта.

Нејзината сестра Саба студирала на Катедрата за биолошки науки исто така во Алберта.

Заедно со сестрите, беше објавено дека неколку универзитетски професори, Мојган Данешман и Педрам Мусави, како и нивните две деца настрадале во несреќата на авионот во Иран. Настрадале и студентите Араш Пурзараби (26) и Пуне Гурџи (25) кои отишле во Иран да се венчаат. Меѓу загинатите се и Елна Набији, Насим Раманафар, Амир Сиедениаа и средношколецот Мохамед Мади Елајсај.

Настраданите професори и студенти беа составен дел на интелектуалната и социјалната структура на нашиот универзитет и пошироката заедница. Во наредните години, ќе го споделиме и славиме придонесот на секој од нив на академските полиња. Последиците од оваа трагедија ќе ги чувствуваме уште многу години, се вели во писмото на Дејвид Х.Тирпен, деканот на Универзитетот, додавајќи дека утре во Едмонтон ќе се одржи спомен на жртвите.

Хајдс Есмалион (42) ја загуби 9-годишната ќерка Рира Есмалион и сопругата Парис Егбалијан на овој лет за Киев. Несреќниот татко и сопруг се збогува со своето семејство со статус на „Фејсбук“.

Не знам како да продолжам. Се сеќавам на мојата ќерка, неколку дена пред несреќата, ми рече дека кога ќе порасне, не сака да оди на Харвард, туку во Хогвортс. Ми беше многу тешко кога се јавив во нејзиното училиште и им кажав дека повеќе ја нема, напиша тој.

Во несреќата загинаа и сестрите Масума Маси и Менди Гави. Канадскиот универзитет во Далхуси во Нова Шкотска, каде студирала Маса, потврди дека таа е загината.

Маси беше на магистерски студии на Инженерскиот факултет во Нова Шкотска. Таа се запиша минатото лето по враќањето од Иран. Таа покрај студирањето, работеше во една компанија за информатичка технологија. Често патуваше со својата помлада сестра Менди, која неодамна се запишала на студии во Халифакс, стои на веб-страницата на Универзитетот.

Тие додадоа дека нивната колешка Шери Фегихи, која предава на Одделот за пародонтологија од 2017 година и работела во нејзината стоматолошка ординација, е трагично настрадана. Во 2011 година, откако ги завршила стоматолошките студии во Техеран, со сопругот и двете деца се преселила во Канада.

Ја обожаваше Нова Шкотска, нејзините колеги и особено нејзината работа, која ја опиша како најголема страст во животот, соопштија тие.

Тричленото семејство, Евин Арсалани (30) и Хива Молани (38) и нивната едногодишна ќерка Курдија исто така беа жртви на летот од украинскиот авион. Браќата на Евин не можат да се помират со загубата.

Во овој момент не ме интересира како се случи несреќата. Единствено што не можам да издржам е што изгубив членови на семејството, рече Омид Арсалани.

Сопружниците биле Канаѓани со иранско потекло. Тие се венчале во 2012 година и лани ја добиле ќерка си.

Минатиот месец, тие отпатуваа за Иран за да присуствуваат на свадбата на еден пријател на Молани. Ја повикав Хива еден ден пред несреќата. Ми рече дека сè е добро, и ми кажа кога треба да се вратат. Подоцна дознав за трагедијата. Дознав дека тие никогаш нема да се вратат, раскажува пријател на семејството.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.