Прекинот на огнот меѓу Израел и палестинските милитанти на Хамас во Појасот Гaза, до денеска се почитува, а официјални лица тврдат дека египетските посредници на двете страни се обидуваат да постигнат подолготраен договор за прекин на огнот

Примирјето почна во петокот рано утрината, во 2 часот, со што заврши 11-дневната размена на гранатирања што предизвика меѓународна загриженост дека ќе има уште поширок конфликт во регионот.

Египет, земјата која посредуваше во завршувањето на конфликтот со помош на САД, во петокот околу пладне испрати делегација во Израел да разговара за зајакнување на примирјето, вклучувајќи и испраќање помош за Палестинците во Газа, соопштуваат претставници на Хамас за британските медиуми.

Делегатите оттогаш посредуваат меѓу Израел и Газа, додека преговорите продолжиле и денеска.

И покрај вчерашните судири меѓу израелската полиција и палестинските демонстранти во Ерусалим, од денеска изутрина нема извештаи за ракетни напади на Хамас од Газа или израелски воени напади врз енклавата.

Американскиот претседател, Џо Бајден, пред два дена изјави дека Вашингтон ќе работи со Обединетите нации на доставувањето хуманитарна помош во Газа, како и помош во градењето, со внимателност оваа помош да не се користи за вооружување на Хамас, движење кое Западот го смета за терористичко.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.