Турската полиција уапси повеќе осомничени во врска со бомбашкиот напад на пешачка авенија во Истанбул, во кој загинаа шест лица, а десетици беа ранети. Турскиот министер за правда изјави дека бројот на притворените сега се искачи на 50, пренесува ABC News.

Терористичкиот напад се случи во неделата на авенијата Истиклал, популарна улица со продавници и ресторани. Нападот од неделата потсети на бомбашките напади во турските градови меѓу 2015 и 2017 година. Турските власти ја обвинија за нападот забранетата Курдистанска работничка партија (ПКК), како и групите на сириските Курди поврзани со неа. Курдските милитантни групи, сепак, негираат вмешаност.

Неколку часа по експлозијата, полицијата во Истанбул изврши рации и приведе 48 лица, меѓу кои и една Сиријка осомничена дека оставила ТНТ-бомба на улицата Истиклал. Полицијата соопшти дека жената, идентификувана како Ахлам Албашир, илегално преминала во Турција од Сирија и признала дека го извршила нападот.

Турскиот министер за правда Бекир Боздаг денеска изјави дека бројот на осомничените во притвор е зголемен на 50, но не наведе детали. Државната агенција Анадолу објави дека полицијата денеска уапсила двајца браќа, идентификувани како Амар Ј и Ахмед Ј.

Амар Ј., наводно, имал задача да ` помогне на Албашир да избега од Истанбул во соседна Грција по нападот. Ахмед Ј., наводно, го однел осомничениот, кој сèи уште е во бегство, во провинцијата Едрене, во близина на границата со Бугарија, јавува Анадолија.

По нападот, околу 80 лица се хоспитализирани, од кои најмалку 57 се отпуштени. Шест од ранетите се на интензивна нега, а двајца се во тешка состојба, соопштија властите.

Шестмината кои загинаа во експлозијата биле членови на три семејства, а меѓу нив имало и две девојчиња на возраст од девет и 15 години.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.