Организацијата на ОН за образование, наука и култура (УНЕСКО) предупреди дека во 2020 година во светот имало 20 отсто повеќе ученици кои не ги стекнале основните вештини за читање, очекувани за нивната возраст, поради делумното затворање на училиштата во текот на пандемијата на Ковид-19.

Бројот на деца со проблеми во читањето е поголем за 100 милиони, достигнувајќи 584 милиони минатата година, што е зголемување за повеќе од 20 проценти, што го неутрализира напредокот постигнат во последните две децении – се наведува во деталниот извештај УНЕСКО, во кој се додава дека станува збор за „генерациска катастрофа“.

Тој клучен индикатор секоја година ја мери способноста за читање на децата во второ и трето одделение во основно училиште, што е основно знаење кое ако не е солидно, може долгорочно да го попречи образованието на учениците.

УНЕСКО стравува дека ќе следи деценија од нарушување поради корона кризата и повикува на вонредни напори, како што се воведување курсеви и стратегии за да се надополни овој заостаток.

Образованието треба да биде приоритет во мерките преземени кон здравствената криза и во плановите за закрепнување. Треба да се мобилизира меѓународната соработка за да се почитува основното право на образование и да се обезбеди континуитет во учењето – изјави генералната директорка на УНЕСКО, Одри Азуле пред одржувањето на меѓународниот состанок на министрите за образование в понеделник.

Во извештајот се наведува дека 65 проценти од владите на земјите со ниски приходи го намалиле финансирањето на образованието, во споредба со 35 проценти од земјите со високи приходи.

„Загубите во учењето“ ќе бидат најголеми во Латинска Америка и на Карибите и во Централна и Јужна Азија. Училиштата се целосно затворени во триесетина земји, вклучувајќи ги Мексико, Унгарија и Саудиска Арабија.

Образовните установи се целосно отворени во околу половина од земјите во светот (107), главно во Африка, Азија и Европа.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.