Украинскиот претседател Володимир Зеленски изјави дека преносот на електрична енергија во Романија е почеток на процес кој може да и помогне на Европа да ја намали зависноста од руските јаглеводороди.

Зеленски ова го изјави во ноќната видео порака по најавата на премиерот Денис Шмухал дека претходно во текот на денот почнал извозот во износ од 100 мегавати, четири месеци по почетокот на руската воена операција во Украина.

Почетокот на извозот е уште еден значаен чекор во нашето движење кон Европската Унија – вели Зеленски.

Тој додаде дека „благодарение на украинската електрична енергија, значителен дел од рускиот гас што го користат европските потрошувачи може да биде заменет“.

Затоа, ова не е само прашање на заработка од извоз за нас, туку прашање на безбедност за цела Европа – изјави Зеленски, потсетувајќи и на поврзувањето на Украина со заедничкиот енергетски систем на ЕУ.

Во средината на март, Украина постигна договор за приклучување кон Европската мрежа на преносни систем-оператори за електрична енергија (ENTSO-E) како набљудувач, откако нејзината мрежа ќе се поврзе со мрежата на ЕУ.

ENTSO-E неделава објави дека се завршени подготовките за првиот извоз од Украина, заедно со електрична енергија од Молдавија, почнувајќи од 30 јуни, користејќи интерконекција со Романија.

Наскоро ќе следи и тргување со електрична енергија на други интерконекции меѓу Украина и Словачка, Украина и Унгарија, како и меѓу Молдавија и Романија. Во првата фаза капацитетот со кој ќе се тргува ќе биде поставен на 100 мегавати.

Во претходна најава, премиерот Шмихал изјави дека извозниот потенцијал на Украина во Европа ќе достигне 2,5 гигавати.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.