Барањето на американскиот претседател Доналд Трамп за зголемено присуство на НАТО на Блискиот исток не е изненадувачко, изјави денеска генералниот секретар на Алијансата, Јенс Столтенберг. Тој на прес-конференција кажа дека разговорите за ова прашање штотуку се почнати и бараат постигнување едногласност и затоа засега се воздржува од прогноза како тие ќе завршат.

Зголемувањето на нашето присуство во регионот наметнува согласност од државите што се таму, а тоа ќе одземе време, забележа Столтенберг.

Тој прецизираше дека НАТО располага со можности да одговори на барањето на Вашингтон.

Генералниот секретар посочи дека проблемите на Блискиот исток се закана за сите, како и дека за изноѓање на решенија се неопходни политички, дипломатски, економски и воени мерки.

Според него, НАТО и сега е присутен на Блискиот исток со своите напори во борбата со тероризмот. Најдобриот одговор на терористите не се воените операции, туку обуката на локалните безбедносни сили.

НАТО го задржува своето присуство во Ирак, остануваме во тесна врска со локалните власти. Ситуацијата на Блискиот исток останува несигурна. Никој нема интерес од нов конфликт, стабилноста е важна за сите во НАТО, дополни Столтенберг.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.