Американскиот Стејт департмент значил уште шест кинески медиуми како странски мисии. Државниот секретар на САД, Мајк Помпео, објасни дека овој потег има за цел „потиснување на комунистичката пропаганда“.

Помпео информира дека како редовни странски мисии се обележани „Yicai Global“, „Jiefang Daily“, „Xinmin Evening News“, „Social Science in China Press“, „Beijing Review“ и „Economy Daily“, со што бројот на медиуми со ваква ознака се зголеми на 15.

Ние не поставуваме никакви ограничувања на она што овие медиуми можат да го објавуваат во САД. Ние едноставно сакаме да обезбедиме дека Американците и корисниците на информации можат да разликуваат вести за слободен печат од пропаганда дистрибуирана од самата Кинеска комунистичка партија – изјави Помпео.

Главниот уредник на кинескиот весник „Глобал тајмс“, Ху Ксијин, напиша на Твитер дека Соединетите Американски Држави претерале и дека Кина ќе возврати.

Сè додека кинеските медиуми трпат вистинска штета, Пекинг сигурно ќе возврати, а работата на американските медиуми во Кина може да биде вклучена во списокот на одмазда – напиша Ксијин.

Стејт департментот побара од кинеските медиуми да се регистрираат како странски мисии, а во март објави дека го намалува бројот на новинари кои имаат дозвола да работат во американските дописништва на најголемите кинески медиуми од 160 на 100.

Како одговор, Кина протера десетина американски дописници за „Њујорк Тајмс“, „Вол Стрит Журнал„ од Њуз Корп и „Вашингтон Пост“.

САД, исто така, минатиот месец соопштија дека ќе бараат од кинеските дипломати да добијат одобрување од Стејт департментот пред да ги посетат универзитетските кампуси во САД или да одржат културни настани со над 50 лица надвор од мисијата. 

Помпео на прес-конференција изјави дека САД утре ќе почнат дијалог за Кина со Европската унија.

Тој додаде дека во недела ќе отпатува за Индија, Шри Ланка, Малдиви и Индонезија и изрази надеж дека на состаноците ќе има дискусии за тоа како „слободните нации можат да работат заедно за да се спречат заканите од Кинеската комунистичка партија“.

 

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.