Северна Кореја и во последниот извештај до Светската здравствена организација (СЗО) информира дека нема забележано случаи на зараза со Ковид-19 и дека сè уште совршено успева да го спречи вирусот да влезе во земјата.

На почетокот на пандемијата пред повеќе од една година, изолираната држава ги опиша своите напори да спречи влегување на вирусот „како прашање на национално преживување“.

Официјален Пјонгјанг ги затвори границите, забрани доаѓање на туристи, а странските дипломати ја напуштија земјата. Северна Кореја продолжува строго да го ограничува прекуграничниот сообраќај и стави во карантин десетици илјади луѓе кои имале симптоми на заразата.

Пјонгјанг тврди дека не е регистриран ниту еден случај на Ковид-19, за што постои големо сомневање со оглед на слабата здравствена инфраструктура и порозната граница со Кина.

Едвин Салвадор, претставник на СЗО во Северна Кореја, информира дека земјата пријавила дека од почетокот на пандемијата до 1 април тестирала 23.121 лице за корона вирусот и оти сите резултати биле негативни.

Според Северна Кореја, 732 лица биле тестирани од 26 март до 1 април.

Официјални претставници на СЗО изјавија дека Северна Кореја повеќе не ја известува агенцијата на ОН за бројот на луѓе што ги става во карантин со сомнителни симптоми.

Северна Кореја вчера соопшти дека ќе ги прескокне Олимписките летни игри во Токио со цел да ги заштити спортистите од светската здравствена криза предизвикана од Ковид-19.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.