Аргентинскиот претседател Алберто Фернандез побара оставка од министерот за здравство Гинес Гонзалес Гарсија по медиумските наводи дека луѓе користеле врски за да бидат вакцинирани против Ковид-19 преку ред, тврдат извори во аргентинската администрација.

Шефот на државата побарал оставка од министерот по јавните обвинувања дека барем десет лица примиле вакцина непочитувајќи ја редовната процедура, а меѓу нив бил и познат новинар кој изјавил дека се вакцинирал откако директно разговарал со Гарсија.

Го побарав својот стар пријател Гинес Гонзалес Гарсија и тој ми рече да одам во болницата Посадас и да се вакцинирам, потврди новинарот Хорацио Вербитски за една локална радио станица.

Локалните медиуми објавија за повеќе случаи на вакцинација на политичари и други лица кои не спаѓаат во приоритетните групи.

Поради сето ова Фернандез побарал оставка од Гарсија, но засега не е објавено името на неговиот наследник, а аргентинското Министерство за здравство се уште нема дадено коментар, велат изворите во претседателскиот кабинет.

Од декември минатата година Аргентина ја користи руската вакцина Спутник В за приоритетна вакцинација на здравствените работници во „црвените зони“, а оваа недела во земјата започна вакцинирање и на некои лица над 70-годишна возраст, но со задолжително закажување и почитување на процедурите.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.