Полскиот претседател Анджеј Дуда потпиша указ, претходно усвоен од Парламентот, со што се воведува ембарго на руските испораки на јаглен и можност за замрзнување на имотот на физичките и правните лица кои ја поддржуваат Русија. Информацијата е објавена на официјалниот сајт на полскиот лидер.

Законот, подготвен од полската Влада, дозволува замрзнување на средства и ресурси во сопственост или контролирани од поединци, организации и тела вклучени во посебна листа на Министерството за внатрешни работи. Соопштено е дека на списокот ќе има поединци и организации што „директно или индиректно“ ја поддржуваат руската инвазија на Украина.

Според полскиот заменик-министер за внатрешни работи, Мачеј Воншик, санкциите ќе се состојат од четири елементи: замрзнување на имотот, ограничување на правото на располагање со имотот, забрана за јавни набавки и забрана за влез во Полска на лица, кои ќе бидат вклучени во листата, по барање на специјалните служби, Обвинителството, Владата и на други државни органи. Се очекува списокот да биде објавен следната недела.

Со новиот закон се забранува и увоз и транзит на јаглен од Русија, Белорусија, Донбас. За прекршување на забраната е предвидена административна казна до 20 милиони полски злоти (околу пет милиони американски долари).

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.