Лондонски суд денеска најави дека следната недела ќе одлучи дали да го повика на сослушување поранешниот министер за надворешни работи Борис Џонсон, против кого е поднесена тужба дека лажел за трошоците за британското членство во Европската унија (ЕУ).

Тужбата ја поднел бизнисменот Маркус Бол чии адвокати рекоа дека од судот побарале да го сослуша Џонсон поради кршење на службената должност.

Адвокатите на Бол тврдат дека Џонсон, кој е жесток поддржувач на Брегзит, лажел додека бил градоначалник на Лондон, бидејќи рекол оти Велика Британија, неделно и дава на Унијата 350 милиони фунти (400 милиони евра).

Демократијата бара одговорно и чесно раководење од оние кои вршат јавна должност, велат адвокатите, додавајќи дека Британија никогаш не давала 400 милиони евра неделно на Брисел.

Според нив, Џонсон знаел дека тоа не е вистина, но сепак одлучил да го повтори неколку пати.

Тужбата се однесува на период пред референдумот во јуни 2016 година, со цел да биде измамена јавноста.

Адвокатите на Џонсон, од своја страна, рекоа дека тужбата е „несоодветна” и дека таа е политички маневар откако поранешниот министер беше споменат како можен наследник на Тереза ​​Меј на премиерската функција.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.