Британските пратеници од Конзервативната партија денеска ќе го одржат првиот круг од гласањето за смена на Борис Џонсон од лидерската функцијата во партијата.

Потребната поддршка од 20 колеги ја обезбедија осум кандидати. Попладнево ќе гласаат 358 конзервативни пратеници и од листата на кандидати ќе отпаднат сите кои нема да добијат 30 гласа.

Гласање ќе има и утре, но и следната недела, доколку тоа биде потребно.

За последните двајца што ќе останат во трката, ќе гласаат околу 180.000 членови на Конзервативната партија во Велика Британија.

Се очекува победникот да биде прогласен на 5 септември, а избраниот автоматски ќе биде и премиер на Велика Британија.

Засега фаворити се поранешниот министер за финансии Риши Сунак, министерката за надворешни работи Лиз Трас и министерката за трговска политика Пени Мордаунт.

Претходно, Борис Џонсон поднесе оставка од позицијата претседател на Конзервативната партија поради низата оставки во Владата, како и бунт во партијата, што во изминатите месеци имаше повеќе скандали. Џонсон останува премиер сè додека не се избере нов претседател на партијата.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.