„Во надворешните работи, навистина мораме да преминеме на гласање со квалификувано мнозинство“,

рече Фон дер Лајен во интервјуто за мала група новинари организирано од нејзината канцеларија пред Самитот на Европскиот совет оваа недела, на кој шефовите на држави и влади се очекува да дадат официјална ЕУ. кандидатски статус на Украина и Молдавија, тврди „Политико“.

Порталот посочува дека оваа изјава на Фон дер Лајен е одговор на прашање од Политико.еу за тоа дали и како ЕУ можеби ќе треба да го промени својот процес на донесување одлуки, кој често бара едногласност, со цел да се приспособи на потенцијалните нови земји-членки, вклучувајќи ги не само Украина и Молдавија, туку и земјите од Западен Балкан – Албанија, Црна Гора,  Македонија и Србија.

„Во минатото ЕУ се соочуваше со мачни – и срамни – одложувања на главните одлуки поради противењето на една земја членка. Понекогаш, таквото спротивставување не се однесуваше ни на непосредното прашање за кое се разговара, туку повеќе одразуваше напор да се искористи барањето за едногласност како потпора за да се принуди акција на некоја друга тема. Во еден случај, Кипар ги одложи санкциите на ЕУ против Белорусија со месеци поради загриженоста во Никозија за прашањата поврзани со Турција“,

Во нејзиниот одговор, Фон дер Лајен призна дека таква голема промена во одлучувањето во ЕУ, дури и само за надворешната политика, ќе биде тешко да се постигне, пишува „Политико“ и додава дека што се однесува до промената на барањето за едногласност во другите области, претседателката на ЕК рече дека е невозможно да се даде краток одговор.

„Ќе мораме да го разгледаме секое досие, а ова не е моментот овде за ова интервју“,

рече таа, објавува „Политико“.

Но, во случајот со надворешните работи, Фон дер Лајен рече дека дошла до цврст личен заклучок дека барањето за едногласност не е одржливо.

„За надворешните работи, јас сум длабоко убедена дека тоа не е одржливо, дека Европската Унија не е во состојба да заземе позиција поради едно блокирање на критичните досиеја“,

рече таа, ја цитира „Политико“ изјавата на Фон дер Лајен.

„И брзината со која се случуваат работите… светот сака да го слушне европскиот глас. Брзината е преголема за постојано, или премногу често, да не се слуша и гледа, поради блокирањето на еден. Затоа, навистина сум убедена дека ни треба гласање со квалификувано мнозинство“,

додаде таа.

Во интервјуто Фон дер Лајен рече дека очекува 27-те шефови на држави и влади да ја усвојат препораката на Комисијата за кандидатскиот статус за Украина и Молдавија, а при прифаќањето на препораката, се очекува Европскиот совет да ја повтори сугестијата на Комисијата дека од Украина и Молдавија ќе се бара да исполнат многубројни услови пред почетокот на официјалните преговори за членство.

Фон дер Лајен, во интервјуто, како што пренесува „Политико“, рече дека процесот на пристапување во ЕУ е доволно флексибилен што земјите кандидатки имаат значително влијание врз тоа колку брзо нивните кандидатури се движат напред. Таа истакна дека Словачка и Турција добија „перспектива“ за членство во 1999 година, но дека Словачка напредуваше да стане членка, додека Турција сега е пооддалечена од ЕУ отколку пред 23 години.

„Словачка сакаше да се приклучи на Европската унија и имаше огромно единство во земјата. Им требаа пет години и да станат членки. Турција денес е подалеку од Европската Унија отколку што беше во 1999 година. Затоа, ова е доказ дека нема автоматизам. Нема цврста шема. Ние поддржуваме доколку е потребно – но зависи од земјата да докаже дека е погодна за пристапување“,

ја пренесува Политико изјавата на Фон дер Лајен.

Дека нема да биде можно ЕУ во иднина да одлучува за сè едногласно викендов порача и германскиот канцелар Олаф Шолц во интервју за ДПА, велејќи дека е потребно олеснување на процесот на проширување. Тој рече дека се надева оти ќе ги изнесе своите предлози на Самитот на ЕУ закажан за четврток и петок.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.