Унгарскиот премиер Виктор Орбан испрати порака со поддршка до Милорад Додик пред изборите во Босна и Херцеговина.

Тој изрази надеж дека и по нив ќе има можност да соработува со досегашниот член на Претседателството на БиХ кој е кандидат за претседател на Република Српска.

Во пораката Орбан вели дека Додик е „човек кој е подготвен да го зачува мирот, кој е отворен за дијалог, кој се залага за почитување на Дејтонскиот договор и кој секогаш и во сите околности ги штити интересите на српскиот народ“. јавува РТРС.

„Унгарија и Србија се соседи, но Унгарија ја смета и Република Српска за свој почесен сосед. Затоа за нас е многу важно она што се случува во вашата земја. Тоа влијае на Унгарија и на целиот регион, но секако дека влијае и на вашите животи, што значи, влијае на животите на нашите пријатели“, нагласи Орбан.

Тој рече дека претстојат важни избори во Српска и дека добро го познава Додик, за кого рече дека е „добар пријател на Унгарија и унгарскиот народ“ и дека е горд на нивното лично пријателство.

„Отсекогаш сум го поддржувал, затоа и во иднина сакам да соработувам со него. Се надевам дека ќе имам можност да го направам тоа по изборите“, изјави унгарскиот премиер.

Додик му се заблагодари на Орбан за неговата поддршка, според РТРС.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.