Светската здравствена организација (СЗО) објави дека пандемијата на Ковид-19 усмртила еден милион луѓе во светот само од јануари.

Организацијата ги повика владите да ја забрзаат вакцинацијата бидејќи една третина од светската популација не е вакцинирана.

Од почетокот на годината ја надминавме трагичната бројка од еден милион смртни случаи поради Ковид-19 – истакна на прес-конференција генералниот директор на СЗО, Тедрос Аданом Гебрејесус.

Тој ги повика владите на сите земји да ги удвојат напорите за вакцинирање на сите здравствени работници, стари лица и загрозени лица со цел вкупната стапка на вакцинација да биде 70 проценти.

Тедрос изрази задоволство што само десет земји имаат стапки на вакцинација под 10 проценти.

Но, имаме уште многу работа – порача Гебрејсус.

Според него, третина од светското население сè уште не е вакцинирано, вклучувајќи две третини од здравствените работници и три четвртини од постарите лица во земјите со ниски приходи.

Најновата статистика на СЗО покажува дека пандемијата на Ковид-19 е одговорна за 6,45 милиони смртни случаи ширум светот откако се појавија првите случаи на крајот на 2019 година во провинцијата Вухан, во Кина.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.