Во германската провинција Баден-Виртемберг, во среда ќе стапи во сила мерка според која невакцинираните луѓе, доколку се разболат од Ковид-19 и мора да бидат ставени во изолација, нема да примаат плата за тој период.

И други германски провинции, како Северна Рајна-Вестфалија, Хесен, Долна Саксонија и Мекленбург-Западна Померанија, планираат од 15 септември да усвојат таква мерка.

Министерот за здравство на Баварија Клаус Холечек изјави дека оние кои не се вакцинирани и немаат здравствени причини за да не ја примат вакцината, според него, немаат право на плата за време на карантин

– Не може општеството да плаќа за нив, рече тој, најавувајќи дека покраината може да се приклучи кон усвојување на оваа мерка.

Германската канцеларка Ангела Меркел денеска побара од своите сограѓани да ја искористат неделната кампања за вакцинација против Ковид-19, во рамки на која жителите ќе можат да добијат бесплатна доза вакцина на местата каде се вршат богослужби, во спортски објекти, како и во јавниот превоз.

Стравувајќи дека стапката на вакцинација во земјата, која моментално е околу 62 проценти, нема да биде доволна за да се спречи зимскиот бран на инфекција со Ковид, особено поради доминантната Делта варијанта, Владата одлучи да ја поттикне вакцинацијата за сите оние кои досега се двоумеа.

Никогаш досега не било полесно да се вакцинира и никогаш не било можно тоа да се направи побрзо, рече Меркел во нејзиниот неделен поткаст, додавајќи дека на германските граѓани во понеделник ќе им биде дадена доза од вакцината, која ќе можат да ја добијат без претходна најава на местата каде се вршат богослужби, спортски објекти и во јавниот превоз.

Меркел истакна дека досега 66 проценти од населението ја примило првата доза на вакцината, а 62 проценти се целосно вакцинирани, сепак, бројот на нови случаи на инфекција со коронавирус е во пораст, а повеќето хоспитализирани се невакцинирани.

За да ја пребродиме претстојната есен и зима, треба да убедиме повеќе луѓе да се вакцинираат. Ве молам: заштитете се себеси и другите. Вакцинирајте се, им порача германската канцеларка на своите сограѓани.

Од почетокот на пандемијата, околу четири милиони луѓе во Германија се заразија со коронавирус, а повеќе од 90.000 починаа.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.