Предвременото гласање за претседателските избори во САД што ќе се одржат на 3 ноември веќе го надмина нивото забележано пред четири години, во 2016 година.

Американскиот институт УС Елекшн Проџект основан при Универзитетот на Флорида, објави дека до вчера, одноно до девет дена пред изборите, гласале 59 милиони граѓани.

Во 2016 година, предвреме гласале 57 милиони граѓани, лично или преку пошта, објави веб-страницата на Комисијата за изборна помош на САД.

Оваа година, милиони Американци гласаа предвреме загрижени поради продолжувањето на пандемијата на корона вирусот или мотивирани од ривалството меѓу републиканскиот претседател Доналд Трамп и поранешниот демократски потпретседател Џо Бајден.

Засега демократите, кои оваа година силно го поттикнаа предвременото гласање, водат во излезноста, но сè уште не е познато дали ова ќе влијае врз конечниот резултат на изборите.

Доналд Трамп и републиканците предупредуваат дека предвременото гласање отвора можност за измама, па затоа се очекува голем број републикански гласачи да го остварат своето граѓанско право на самиот ден на изборите, 3 ноември.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.