Штрајкот во Белгија, што се одржува поради зголемените животни трошоци, го принуди бриселскиот аеродром денеска да ги откаже сите патнички летови, а автобуските линии се прекинати во дел од земјата.

Синдикатите соопштија дека очекуваат десетици илјади луѓе да протестираат во Брисел. Возовите сообраќаат, но делумно за да им овозможат на демонстрантите да се соберат во главниот град на Белгија.

Аеродромот во Брисел соопшти дека не може да дозволи полетување на патнички летови бидејќи штрајкуваат и припадниците на обезбедувањето. Локалниот јавен превоз обезбедува минимални услуги.

Инфлацијата во Белгија достигна девет проценти во јуни и е одраз на наглото зголемување на цените насекаде, главно поради тоа што руската инвазија на Украина го погоди снабдувањето со жито и предизвика зголемување на цените на енергијата.

Премиерот Александар Де Кро рече дека белгиските работници се подобро заштитени од работниците во повеќето други земји од Европската унија, бидејќи платите се индексирани според инфлацијата.

Де Кро изјави за јавниот радиодифузен сервис РТБФ дека владата ги продолжила мерките за намалување на даноците на продажбата на гас, електрична енергија и гориво до крајот на годината.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.