Израелска компанија промовира скакулци како одржлив извор на храна.

На фармата на компанијата „Hargol Foodtech“, скакулците се сместени во објект што некогаш бил кокошарник. Таму се чуваат во низа внимателно наредени, климатски контролирани кафези, каде што се хранат со пченични трева за тримесечниот животен циклус, пред да бидат испечени.

Директорот Дор Тамир како дете слушал приказни за скакулците кои уништуваат полиња во неговиот кибуц. Но, јеменските Евреи кои живееле во близина не сметале дека скакулците се штетници, туку извор на хранливи материи, се сеќава тој.

Кога пораснал, Тамир станал претприемач и нутриционист, кој се грижел за цената што треба да ја плати растечкото население во светот за доволно животински протеини.

Пред шест и пол години, тој сфатил дека скакулците се решението и ја основал компанијата „Hargol“, што на хебрејски значи скакулец.

Негова цел е компанијата да биде прва во светот што одгледува скакулци на комерцијално ниво и да му обезбеди на светот поздрав и поодржлив извор на протеини.

Експертите се согласуваат дека светот би можел да се соочи со голем проблем во снабдувањето со храна. Со околу 10 милијарди луѓе што се очекува да живеат на Земјата до 2050 година, за одгледување добиток само за негова исхрана ќе бидат потребни огромни области на земјиште и еднакво голема количина вода.

Тамир вели дека скакулецот е составен од 70 проценти протеини и ги содржи сите аминокиселини, како и другите хранливи материи. Тој посочува дека тие не содржат заситени масти или холестерол и дека содржат „само добри работи“.

Тој проценува дека околу 2,5 милијарди луѓе, претежно во земјите во развој, консумираат инсекти како дел од нивната редовна исхрана.

Од инсектите, скакулците најмногу се јадат. Но, кога се обидувате да ги продадете на клиенти од Северна Америка или во Европа, најтешкиот дел е надминување на тој „вкусен фактор“ – истакнува Тамир.

За да го направи производот попривлечен за Западните земји, „Hargol“ меле скакулци во прав што потоа може да се мешаат во најразлични јадења.

Тамир се надева дека ќе успее да ги воведе скакулците во редовната израелска кујна со тоа што ќе добие сертификат за кошер за неговите производи од главниот државен рабин, кој веќе некое време разговара за тоа, бидејќи во Тората можеле да се најдат спротивставени тврдења. Имено, некои видови скакулци се прифатливи, додека некои не се.

Тамир е оптимист и верува дека на крајот ќе добие одобрение од рабинот, а во меѓувреме има намера да им понуди на американските и европските христијани енергетски шипки збогатени со протеини од скакулци и еврејски мед.

Конечно, Новиот Завет вели дека Јован Крстител јадел скакулци со мед – вели тој.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.