Италијанските власти вчера ја изгласаа новата мерка, а за сите вработени во приватниот и во државниот сектор стануваат задолжителни дигиталните сертификати за вакцинација, пренесува „Еуроњус“.

Мерката ќе стапи на сила на 15 октомври и ќе трае до крајот на оваа година.

„Ја воведуваме мерката за сите вработени, за да ги направиме работните места побезбедни, но и за да ја засилиме капмпањата за вакцинација“, изјавил италијанскиот министер за здравство Роберто Сперанза.

Според министерството за здравство, мерката се воведува за да се намали инфекцијата од коронавирусот, но и да се ублажи очекуваниот зимски бран.

Сите вработени ќе треба да докажат дека се вакцинирани против Ковид-19, биле негативни на скорешни тестирања или пак го прележале вирусот.

Засега, задолжителниот ковид-пасош не е потребен за пензионери и невработени лица.

Секое вработено лице кое нема да поседува здравствен сертификат ќе биде суспендирано и испратено на неплатен одмор од пет дена, но нема да биде отпуштено од работното место. Истовремено, невакцинираните лица ќе може да бидат казнети и со парична казна во висина од 1.500 евра.

Италијанскиот Сенат гласал за воведување на мерката со 189 гласа „за“, 32 гласа „против“ и два воздржани.

Додека другите европски земји ги направија ковид-пасошите задолжителни само за здравствените работници, Италија е првата земја која ја воведе мерката за сите вработени.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.