Хрватскиот европарламентарец Тонино Пицула денеска е именуван за известувач на Европскиот Парламент за препораките за Западен Балкан, пред Самитот во Загреб во мај 2020 година.

Тој ќе биде одговорен за изработка на препорака од ЕП до Европскиот совет и Еврокомисијата со цел отворање пристапни преговори со Македонија и Албанија.

Една од главните теми и предизвици со кои Пицула ќе се занимава во овој извештај ќе биде пронаоѓање консензус во Советот во однос на процесот на проширување кон земјите од Западен Балкан, се посочува во соопштението од Стразбур, пренесува Хина. Цел на извештајот е да се анализира и да се одговори на новите предлози за реформа на политиката на проширување.

Дебатата за реформи не смеат да го запрат процесот. Државите треба да бидат оценувани индивидуално, врз основа на индивидуалните заслуги и постигнувања. Црна Гора, на пример, е предводник на тој процес и очекувам остварените резултати и вложените напори да бидат признати и да ги затвори пристапните преговори за време на овој мандат- потенцираше Пицула.

Тој рече дека во соработка со сите држави од Западен балкан и ЕУ институциите, ќе биде понуден сет конкретни препораки кои ќе овозможат отстранување на блокадата и конечно отворање преговори со Македонија и Албанија во мај во Загреб.

Пицула оцени дека францускиот претстедател Емануел Макрон направил грешка кога со блокирањето на отворањето преговори со Скопје и Тирана успеал нешто што не планирал – го врати проширувањето во фокусот на расправата на европско ниво.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.