Сообраќаен хаос денеска во делови на Франција, а заслужни се „жолтите елеци“.

Компанијата што оперира со патарините – Vinci Autoroutes, соопшти дека протести се во тек на 40-тина локации од нивната мрежа, како и дека дел од наплатните станици се сериозно оштетени, особено на југот на земјата.

Наплатната станица Бандол, источно од Марсеј, во вторникот вечерта била запалена, а автопатот А50 е затворен за сообраќај, соопштува компанијата, која претежно оперира со патарините на западот и југот на земјата.

Операторот апелира до возачите во Франција да бидат крајно внимателни додека се приближуваат на некоја од наплатните станици, но и кога се приклучуваат на автопатот – поради големиот број пешаци.

Исто така, проценуваат дека од почетокот на протестите, на нивната инфраструктура ѝ е нанесена штета во износ од неколку десетици милиони евра, и тоа без да се пресметани загубите од пропуштениот приход, со оглед дека демонстрантите им овозможија на илјадниците возила бесплатно да поминуваат преку патарините.

Досега паднаа и неколку човечки жртви во сообраќајни несреќи предизвикани (барем делумно) од препреките и барикадите поставени од „жолтите елеци“ на патарините и патиштата.

Блокадите и демонстрациите на дел од патиштата, патарините и кружните текови во Франција траат веќе од средината на ноември. „Жолтите елеци“ почнаа како протест против зголемувањето на даноците на горивото, а се претворија во општо незадоволство од политиките на Макрон.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.