Шансите за мир во Украина  „во оваа фаза се минимални“, изјави синоќа генералниот секретар на ОН Антонио Гутереш по телефонскиот разговор со рускиот претседател Владимир Путин.

-Имам чувство дека сме многу далеку од мир. Би лажел ако кажам дека мирот може да се случи наскоро, рече Гутереш на прес-конференција.

„Немам илузии, во оваа фаза шансите за мировен договор се минимални“, рече Гутереш, додавајќи дека дури ни примирјето не е на повидок.

Гутереш додаде дека ги продолжува контактите со двете страни и дека се надева дека еден ден ќе може да се оди кон разговори на повисоко ниво.

Генералниот секретар на ОН разговараше со Путин и за извозот на руски прехранбени производи и ѓубрива.

Кремљ по телефонскиот разговор меѓу двајцата функционери соопшти дека Путин му кажал на генералниот секретар  на ОН дека украинските житарки приоритетно треба да одат во земјите каде што се најпотребни.

Кремљ, исто така, соопшти дека се разговарало и за нуклеарната централа Запорожје и за посетата на тимот на Меѓународната агенција за атомска енергија на ОН (МААЕ), како и дека Гутереш пренел дека се подготвува посета на експерти на ОН на затворот Оленивка, во источна Украина, каде десетици украински воени затвореници загинаа во бомбардирањето на крајот на јули.сд/



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.