Германската владина Комисија за јаглен рано изутринава донесе одлука да предложи целосен прекин на користењето на овој енергенс во Германија до крајот на 2038 година, јави ДПА.

Во соопштението од 21-часовната седница на Комисијата, што започна вчера претпладне, се посочува дека е постигнат договор за постепено исфрлање на јагленот од производството на електрична енергија во Германија, како и да се обезбедат средства за компензација на енергетските компании.

Комисијата има надлежност само да дава предлози, а носењето конечна одлука по нејзините сугестии е во ингеренции на Федералната влада во Берлин и на на владите на германските сојузни покраини.

Целта на ваквиот предлог е Германија да ги исполни поставените приоритети за заштита на животната средина и за запирање на климатските промени.

Во рамите на борбата за заштита на животната средина, Германија веќе донесе одлука за затворање на нуклеарните електроцентрали до крајот на 2022 година.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.