Меѓународниот монетарен фонд (ММФ) денеска објави дека до 20 земји, од кои многу се во Африка, би можеле да побараат итна помош за справување со глобалната криза со храна.

Директорката на ММФ, Кристалина Георгиева, говорејќи на конференција во Саудиска Арабија, рече дека 141 милион луѓе ширум арапскиот свет може да бидат изложени на недостиг на храна, пренесува „Ројтерс“.

ММФ во петокот одобри нова рамка за задолжување со храна, потпирајќи се на постојните инструменти за финансирање во итни случаи за да им помогне на ранливите земји да се справат со недостигот на храна и високите трошоци кои произлегуваат од војната во Украина.

Георгиева рече дека 48 земји во светот се особено изложени на криза со храна, од кои 10 до 20 најверојатно ќе имаат потреба од итна помош во храна, а повеќето од нив се во субсахарска Африка.

„Ројтерс“ пренесува дека ММФ ќе го даде својот глас во борбата против ограничувањата во трговијата со храна за да ја олесни ситуацијата и планира да го финансира недостигот на храна.

Британската агенција забележува дека земјите од регионот на Блискиот Исток зачекориле напред за да ги поддржат државите кои се борат со висока инфлација и недостиг на храна, влошени од зголемениот ризик од глобална рецесија.

Георгиева изјави дека арапските држави од Персискиот Залив планираат наскоро да се обврзат да обезбедат првични 10 милијарди долари за ублажување на глобалната криза со снабдување со храна.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.