Американскиот производител на лекови „Мерк“ соопшти дека регулаторната здравствена агенција на ЕУ- ЕМА отворила постапка за оценување на експерименталниот лек против Ковид-19 на компанијата.

ЕМА ја почна првата континуирана евалуација на податоците за лековите, што значи дека ќе ги оценува податоците веднаш штом ќе станат достапни, наместо да чека формална апликација откако ќе се соберат сите податоци.

Студиите на „Мерк“ покажале дека лекот „молнупиравир“ за околу 50 отсто ги намалува хоспитализациите и смртните случаи од Ковид-19.

„Мерк“, која го развива „молнупиравир“ со партнерот „Риџбек Биотерапевтика“, на 11 октомври поднесе барање до американскиот регулатор за итна употреба на лекот.

Група надворешни советници на здравствениот регулатор во САД ќе се состанат кон крајот на ноември за да разговараат за одобрување на овој антивирусен лек.

Доколку биде одобрен од регулаторите, „молнупиравир“ ќе биде првиот лек против Ковид-19 што ќе се дава орално, а исто така и првиот третман за луѓе со благи симптоми, додека постоечките лекови најчесто се користат за лекување на критично болни.

„Мерк“ има договор со САД да продава лекови доволни за 1,7 милиона лица, а еден третман со овој лек чини 700 долари.

„Мерк“ неодамна потпиша договори со Велика Британија, Малезија, Сингапур и други земји.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.