Европската агенција за лекови (ЕМА) утврди можна поврзаност меѓу ретките срцеви заболувања и мРНА вакцините против Ковид-19 на „Фајзер/Бионтек“ и „Модерна“. Истовремено, од ЕМА препорачаа луѓето со ретки крвни нарушувања да не се вакцинираат со вакцината на „Џонсон и Џонсон“.

Срцевите проблеми, какви што се миокардитис (воспаление на срцевиот мускул) и перикардитис (воспаление на срцевата обвивка) мора да бидат наведени како можни несакани ефекти на двете мРНА вакцини – соопшти Одборот за безбедност на Европската агенција за лекови.

Од ЕМА наведуваат дека такви случаи се случиле во рок од 14 дена по вакцинирањето, почесто по втората доза, и кај млади возрасни мажи. Ова се совпаѓа со наодите на американските здравствени власти објавени минатиот месец.

Панелот на ЕМА исто така истакна дека луѓето со синдром на истекување на капиларите (ЦЛС) не треба да се вакцинираат со вакцината на „Џонсон и Џонсон“.

Во јуни, ЕМА побара ЦЛС да се додаде на списокот на несакани ефекти од вакцината на „АстраЗенека“.

Вакцините на „АстраЗенека“ и „Џонсон и Џонсон“ користат различни верзии на вирусот на настинка за да пренесат упатства за создавање протеин на корона вирусот и да предизвикаат имунолошки одговор во организмот.

Европската агенција за лекови исто така соопшти дека е премногу рано да се знае дали ќе бидат потребни повеќе од две дози вакцина против Ковид-19. Се смета дека засега се доволни две дози.

Од „Фајзер/Бионтек“ вчера соопштија дека планираат да побараат од американските и европските регулатори да одобрат довакцинација со трета доза, врз основа на докази за зголемен ризик од зараза шест месеци по вакцинацијата и поради ширењето на многу заразната делта варијанта на вирусот, која прво беше идентификувана во Индија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.