Ден откако Европската комисија презентираше стратегија за развој на лекови против КОВИД-19, Европската агенција за лекови (ЕМА) започна со континуирано испитување на еден лек, објави Комисијата во петокот.

Станува збор за сотровимаб, моноклонско антитело развиено за третман на болеста КОВИД-19.

Континуирана студија започната од ЕМА ќе ја процени ефективноста на сотровимаб во спречување на хоспитализација и смрт, неговата безбедност и квалитет, соопшти Комисијата.

Континуираното тестирање е побрзо од редовното бидејќи податоците се анализираат веднаш штом пристигнат.

Доколку ЕМА го препорача овој лек на крајот од испитувањето, Комисијата ќе го одобри многу скоро.

Европската комисија во четвртокот ја претстави стратегијата за развој на лекови против КОВИД-19, што предвидува одобрување на три лекови до октомври годинава, со можност уште два да бидат одобрени до крајот на годината.

Слично на развојот на вакцините, Комисијата најавува дека ќе инвестира во истражување и иновации, во идентификување на нови ветувачки лекови и зголемување на производствениот капацитет. Ова вклучува заедничка набавка на лекови и создавање портфолио на ветувачки лекови, како и потпишување на пред-договори со производителите, како што е направено со вакцината против КОВИД-19.

Комисијата објави дека ќе создаде портфолио од 10 потенцијални лекови против КОВИД-19 и до јуни годинава ќе ги идентификува петте најперспективни.

Досега, само еден лек против КОВИД-19-19, ремдесивир, е одобрен во Европската унија. Светската здравствена организација заклучи дека ремдесивирот не е ефикасен кај потешките форми на КОВИД-19.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.