Повеќе од 160.000 лица демонстрираа во Франција денеска против новите здравствени мерки, од кои околу 11.000 во Париз. Полицијата вечерва успеа да ја врати контролата кај Елисејските полиња, додека демонстрантите викаа: „Ова го правиме за вашите деца“, „Направете државен удар, момци!“ „Макрон, пикни си го пасот во газот“, јави дописникот на МИА.

Според проценките на Министерството за внатрешни работи, денеска демонстрираа 161.000 демонстранти во Франција, наспроти 114.000 минатата недела. Од друга страна, тие биле помалубројни во Париз 11.000 наспроти 18.000 на 17 јули.

Фото: EPA-EFE/YOAN VALAT

Најважните собири се одржаа во Париз, но исто така и на југот на Франција, во Марсеј, Ница и во Монпеље. Вкупно, Министерството за внатрешни работи забележа 168 демонстрации на кои најчесто можеше да се слушнат извиците „За слобода“, како и да се видат паролите „Против здравствената диктатура“, „Против проширувањето на здравствениот пасош“ и „Против задолжителна вакцинација за ковид-19 за одредени професии“.

Многу големо мнозинство Французи (76 отсто) ја одобрува одлуката на претседателот Емануел Макрон да ја направи вакцинацијата задолжителна за здравствените работници и за другите професии, со казни. Проширувањето на здравствениот пасош (целосна вакцинација или неодамнешен негативен тест) добива мнозинско одобрување, но нивниот процент варира во зависност од засегнатите места.

– Ќе поминевме и без здравствениот пасош ако контекстот беше поинаков – рече министерот за здравство Оливие Веран, додавајќи дека ќе му стави крај на ова што е можно побрзо.

– Кога 90 или 95 отсто од населението ќе бидат вакцинирани ќе имаме 300 случаи дневно, место сегашните 20.000. Ќе живееме со ковид-19 сѐ додека не исчезне самостојно – рече министерот пред Сенатот во петокот вечерта, објаснувајќи дека моделите „предвидуваат силен бран со кој ќе бидат погодени болниците, што може да биде многу тежок на средина или на крајот на август“.

Во обид да се запре прогресијата на делта варијантата на вирусот, претседателот Макрон на 12 јули претстави серија мерки, што делумно влегоа во сила во средата. Иако потврдата веќе се бара во културните и забавните простории, мерката треба да се прошири на кафулињата, рестораните и возовите на почетокот на август.

Одредбата за новиот текст, која моментално се разгледува во Сенатот по усвојувањето во првото читање во Националното собрание, го отвора патот за отпуштање на работници во установи отворени за јавноста кои одбиваат да имаат здравствен пасош, односно целосна вакцинација. Предлог-законот, исто така, предвидува задолжителна вакцинација за негуватели, медицински персонал, пожарникари и професионалци кои работат со стари лица.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.