Американскиот претседател Џозеф Бајден на 15 јули во Вашингтон ќе се сретне со германската канцеларка Ангела Меркел, со која ќе разговара за кибер нападите врз американски компании и за гасоводот „Северен поток 2“ што се гради од Русија до Германија, соопшти Белата куќа.

Портпаролката на Белата куќа, Џен Псаки прецизираше дека Бајден и Меркел ќе разговараат за „рансомвер“ нападите врз компании во САД, со кои се ограничува пристапот до компјутерски систем или сочуваните податоци и се бара откуп од жртвите на нападите.

Таа додаде дека Бајден сè уште гледа на Северен поток 2 како на „лоша работа“.

Псаки одби да каже дали ќе биде постигнат договор за американските тарифи за германската компанија „Северен поток 2 АГ“ и нејзиниот извршен директор, кои беа привремено суспендирани.

Ова ќе биде прва посета на Меркел на Вашингтон откако Бајден стапи на функцијата во јануари годинава.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.