Австралија бара Европската унија да испрати еден милион дози вакцини против коронавирус во Папуа Нова Гвинеја. Барањето на Канбера официјално ќе биде поднесено денеска, пренесува Дојче веле. Тоа може дополнително да ги влоши постојните тензии меѓу Австралија и ЕУ околу вакцините. Канбера го обвини Брисел за вакцинален национализам, откако ЕУ неодамна блокираше пратка за вакцини наменета за Австралија.

Австралискиот премиер Скот Морисон изјави дека има договор за вакцини што треба да и бидат дадени на Австралија и сега тие имаат огромна потреба да го запрат ширењето на коронавирусот во Папуа Нова Гвинеја, која е близу до Австралија.

Склучивме договор за тие вакцини. Плативме за нив и сакаме овие дози да дојдат тука за да можеме да го поддржиме нашиот најблизок сосед, Папуа Нова Гвинеја, за да ги задоволиме нивните итни потреби, рече Морисон.

Тој ја нарече Папуа Нова Гвинеја семејство и пријател на Австралија, покрај тоа што е сосед и партнер, и рече дека е во интерес на Австралија и регионот да има итни вакцини за земјата.

Австралија ќе донира 8.000 локално произведени вакцини против коронавирус на Папуа Нова Гвинеја, а дополнителни милион дози ќе и бидат доставени веднаш штом пристигнат од Европа.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.