Американски шпионски авион утрово прелетал во близина на Корејскиот Полуостров, во обид да ја надгледува Северна Кореја, објави јужнокорејската служба за следење на авионите.

Како што објави јужнокорејската новинска агенција Јонхап, американскиот авион Е-8Ц „Џоинт старс” (Joint stars) е забележан на небото над Жолто Море. Истиот авион е забележан како изведува операции во саботата, во истиот реон.

Авионот надлетува во близина на Северна Кореја по наводите дека Пјонгјанг би можел да тестира ново оружје непосредно пред претседателските избори во САД што се закажани на 3 ноември.

Севернокорејскиот лидер Ким Џонг-ун на 10 октомври најави дека ќе продолжи да го зајакнува одбранбениот систем на земјата, а на воената парада во Пјонгјанг беше презентирана нова интерконтинетална балистичка ракета.

Пјонгјанг и Вашингтон минатата година ги прекинаа разговорите за севернокорејската нуклеарна програма.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.