Градоначалникот на град Скопје Петре Шилегов, по укажувањето од страна на Државната комисија за спречување на корупција (ДКСК) за судир на интереси го раскинал договорот за консултантски услуги со неговата адвокатска канцеларија, по што е констатирано оти повеќе не постои состојба на судир на интереси и предметот е затворен.

Меѓутоа, како што рече Билјана Ивановска, претседател на ДКСК на денешната прес-конференција, се испитува и е отворен нов случај за кој слушнале од медиумите дека наводно Град Скопје има склучено некаков договор со адвокатското друштво на Шилегов и од Градот Скопје се одлеваат средства на тој начин.

Во тој дел ние не сме работеле, тоа ќе го провериме и ќе ја известиме јавноста, изјави Ивановска.

Таа појасни дека до ДКСК била доставена пријава што се однесувала на судир на интереси за градоначалникот Петре Шилегов бидејќи тој со своето адвокатско друштво имал склучено договор за консултантски услуги. Од тие причини, ДКСК го повикала Шилегов и му објасниле дека согласно член 44 од Законот, службено лице може да остварува приходи од научни, наставни, културни, уметнички и спортски активности, како и приходи од авторски и други активности…, но не може од консултантски услуги, бидејќи тие не спаѓаат во тој член. На Шилегов му била доставена и одлуката на ДКСК за судир на интереси и го раскинал договорот со адвокатското друштво, по што предметот и бил затворен.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.