Нема да има карантин како мерка против ширењето на коронаворусот, најави премиерот Зоран Заев, бидејќи тоа ќе биде директно на штета на економијата.

Според него, нашата земја немала прв или втор бран, туку во континуитет имало извесна бројка заразени, но тоа го објасни со опсегот на тестирање што се прави тука, односно до последниот контакт на кој може да се сети заразениот, за разлика од другите земји.

Тој најави дека во следниот период ќе се зголеми капацитетот на јавните установи за тестирање и ќе се набават многу поевтини тестови, со што ќе може многу побрзо да се детектираат заразените случаи и нивните контакти и да се изолираат.

СЗО веќе одобри тестови од нови компании, кои се за 30, 40, 50 отсто поевтини од овие сега и резултатите се добиваат за 20 минути. Се надевам дека на тој начин ќе се зголеми капацитетот на јавните здравствени установи, а потоа тоа ќе се одрази на приватните, бидејќи никој нема да плаќа поскапо ако има ваква можност – рече Заев во емисијата „Само интервју“ на Канал 5.

Директорот на СЗО, Тедрос Адана Гебрејесус на денешната прес конференција во Женева најави дека за земјите со низок и среден приход ќе се обезбедат околу 120 милиони брзи дијагностички тестови на ковид-19. Во рок од шест месеци овие тестови треба да бидат достапни до сите земји, а нивната максимална цена не треба да биде поголема од пет долари.

Тестовите, како што рече, даваат сигурен резултат за само 15 минути.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.