Претседателот на Владата, Зоран Заев, се сретна со Џанг Ѕуо, амбасадор на Народна Република Кина во нашата држава.

На средбата е предадено писмо од кинескиот премиер Ли Кечијанг, со честитки до премиерот Заев, за изборот на новата Влада.

Премиерот Заев упати благодарност до кинескиот премиер Кечијанг, на амбасадорот Ѕуо и до кинескиот народ за навремената помош и поддршка од НР Кина, на нашата држава, за време на пандемијата, што е потврда за добрите билатерални односи помеѓу двете држави.

Новата Влада силно ќе се посвети на економскиот развој и на значително подобрување на животниот стандард на граѓаните. Немаме повеќе отворени прашања што ги блокираат перспективите на државата. Станавме членка на НАТО, очекуваме почеток на преговорите со ЕУ. Но, независно од нашите стратешки евро-атлански определби, подготвени сме за соработка, посебно на планот на економијата, со сите пријателски држави, меѓу коишто е и НР Кина – рече  Заев.

На состанокот е поздравен напредокот на нашата држава и е соопштено дека Кина ја поддржува нашата држава во државните стратегии за развој на Република  Македонија.

Заеднички е констатирано дека меѓу двете држави постои почитување на стратешките национални определби на државите, но и дека постојат области каде соработката меѓу двете држави бележи нагорна линија и има простор да се унапредува.

Разговарано е за поактивна соработка на планот на образованието, културата, економијата, како во билатералните односи, така и во рамките на 17+1 иницијативата, во којашто се вклучени земјите од Централна и Источна Европа и НР Кина.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.