Градиме дијалог, а не конфликт со Бугарија, смиреност и подготвеност за соработка, наместо национализам за внатрешна употреба и нова изолација, рече премиерот Зоран Заев во интервју за МИА за понатамошните чекори за решавање на спорот со Бугарија.

Премиерот истакна дека комуникацијата со официјална Софија продолжува во насока на изнаоѓање решение и додаде дека билатералните прашања не треба да бидат пречка за европските процеси, ниту изборите во Бугарија да бидат пречка за решавање на билатералните разлики.

Тој очекува специјалниот претставник Владо Бучковски, министерот за надворешни работи Бујар Османи и бугарската министерка за надворешни работи Екатерина Захариева да ја продолжат комуникацијата за изнаоѓање решение по новогодишните празници.

„Во такви предизвикувачки моменти, треба да ги покажеме европските вредности. Дијалог наместо конфликт. Смиреност и подготвеност за соработка, наместо национализам за внатрешна употреба и нова изолација. Заеднички успех наместо заеднички неуспех. И ние и бугарската страна имаме обврска да им обезбедиме на македонските и бугарските граѓани европска иднина, но со почит кон европските вредности “, рече Заев.

Тој истакна дека со неодобрувањето на рамката за преговори, Македонија ќе изгуби драгоцено време, но најголемиот губитник е Европската унија.

„Ќе бидеме што е можно поактивни по ова прашање. Ќе се бориме затоа што нашите деца очекуваат да ги добиеме битките во 21 век, да бидеме во ЕУ и да бидеме безбедни и стабилни како што се сега во НАТО. Нема да дозволиме повторно да се потсмеваат на нашата татковина во кулоарите и на маргините “, уверен е Заев.

Според него, ова е заедничка битка за која сите граѓани на земјата се едногласни – Македонци, Албанци, Турци, Власи, Роми, Срби, Бошњаци и сите други.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.