На бизнисмен од Битола, кој на почетокот на годинава добил тендер во РЕК Битола, висок функционер oд власта му побарал рекет од 250.000 евра во кеш за да може да работи во РЕК Битола, каде што добил тендер за ангажман на механизација, објави порталот Магазин повикувајќи се на укажувач, а потврди од собраниската говорница и пратеникот Антонио Милошоски.

Во текстот пишува дека неколку дена откако бизнисменот го добил тендерот, добил и повик и му била закажана средба од висок функционер на власта, по потекло од Битола. Средбата се остварила во Битола, а функционерот, кој не е дел од раководството на РЕК, побарал од битолскиот стопанственик во рок од неколку дена да му даде 250.000 евра во кеш доколку сака работата на добиениот тендер и исплатата на сработеното да се одвива без проблеми. На таквото дрско барање битолскиот бизнисмен негодувал и барал објаснување, но функционерот од власта бил краток и јасен, средствата се потребни за повисоки цели и мора да се исплатат во кеш.

За да не го плати рекетот, бизнисменот искористил некои свои лични врски со странски дипломати. Ден после таа непријатна средба со функционерот од власта, пишува Магазин, битолскиот бизнисмен заминал за Белград на средба во Амбасадата на Република Белорусија, која нерезидентно ја покрива и Македонија. Заради ургентноста на барањето битолскиот стопанственик бил примен од белорускиот амбасадор Валериј Бриљов, со кого се познавал лично од 2017 година. Битолскиот стопанственик му го објаснил случајот за барањето на огромна сума на рекет во кеш и во име на личното пријателство го замолил амбасадорот на Белорусија да ги искористи своите дипломатски и политички врски во Белград и во Скопје, и да ургира да му помогнат да се спаси да не плати 250.000 евра рекет.

Дали изминатиов период на било кој начин во вашиот кабинет, или во вашата Влада, имало ургенции, контакти од страна на амбасадорот на Белорусија во Белград, го праша премиерот пратеникот Антонијо Милошоски во врска со овој случај.

Заев негираше дека кај него бил белорускиот амбасадор, или било кој од амбасадата и му порача на Милошоски доколку има било какви информации да ги достави до истражните органи.

Сојузот на стопанските комори вчера објави дека член на ССК, сопственик на голема компанија, пријавил дека бил рекетиран од власта. Се работи за член кој не е од Скопје, но од Комората не открија за кого се работи. Дали битолскиот стопанственик е истиот кој го пријавил рекетот во Комората?

 

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.