Најавата од Вселенскиот патријарх Вартоломеј дека ја презема одговорноста за црковното прашање на МПЦ, дава надеж дека ќе се исцели уште една голема рана во православниот свет, вели архимандритот Партениј, игумен на Бигорскиот манастир. Во тој контекст ги става и помошта од Бугарската православна црква, како и скорешното признавање на самостојноста на Православната црква на Украина.
Во интервјуто за “Битолски Весник“ отец Партениј вели: Тука би го истакнал и последниот случај со Црквата во Украина. Тоа ни дава надеж да веруваме дека и во однос на нашата црква ќе се оствари ветувањето, со што ќе се исцели уште една рана во православниот свет. Неслучајно Вселенскиот патријарх го одбра името „Православна Црква во Украина”, наспроти „Украинска Црква’, што покажува дека е решен силно да се спротивстави на ереста етнофилетизам.

Оваа паралела со Православна Црква на Украина упатува на заклучокот дека името на државата, а не името на нацијата ќе биде и моделот за признавањето на нашата црква која од Патријаршијата во Цариград би била признаена како “Православна Црква на Северна Македонија“!
“Се надеваме дека сите цркви ќе се поучат од ова, зашто една помесна, автокефална црква не припаѓа само на еден народ, туку на сите православни кои живеат во нејзината јуриздикција, без разлика на националноста. За жал, гледаме како СПЦ упорно стои на својот став дека треба да ги има под контрола териториите на некогашна Југославија, каде што ширеше српство наместо Христијанство, нешто што очигледно, според духовните закони, им се враќа и удира од глава“, истакнува отецот Партениј.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.