Комисијата за надворешна политика на опозициската ВМРО-ДПМНЕ, бара министерот Никола Димитров јасно да ѝ пренесе на јавноста кои се ефектите од неговите посети на европските престолнини, во очекување на датумот за преговори за ЕУ.

Во ситуација кога македонската јавност очекува резултат од посетите на Никола Димитров на Париз и Берлин и бара одговор за епилогот на неговите дипломатски турнеи по европските престолнини, на неговиот facebook профил синоќа осамна ребус-порака:

 

-“Напред и нагоре! Упорно, до крај. Да го добиеме ЕУ “проектот” за чистење и реновирање на куќата. Е тогаш, уште поупорно.”

 

Наместо искрено обраќање до граѓаните во кое ќе ги пренесе добиените пораки од Франција и Германија, шефот на македонската дипломатија употребува криптирана симболика која може да произведе најразлични толкувања. Последен пат кога збореше за “исправање на куќата”, Димитров се правдаше за срамната, незаконска и политички мотивирана систематизација во Министерството за надворешни работи со која во еден ден беа деградирани триесетина дипломати од кариера. Дали со најавата за “чистење и реновирање” на куќата, сака да порача дека ќе продолжи со реваншизмот, понижувањето и пресметката со професионалците во МНР, меѓу кои има поранешни амбасадори, конзули и дипломати со долгогодишно искуство? Кога вели “до крај”, дали со тоа навестува дека нема да се откаже од партиската кадровска политика во ресорот што го раководи и до крај ќе ги спроведува инструкциите од штабот на СДСМ? Можеби со извикот “напред и нагоре”, мисли на вонредните унапредувања на свои блиски соработници и пријатели, надвор од пропишаните процедури, кои преку ноќ се стекнуваат со високи административни и дипломатски звања. Финишот на статусот со “уште поупорно”, ја индицира ли неговата решеност и понатаму бескрупулозно да ја уништува македонската дипломатија, игнорирајќи ги законските норми и воведувајќи тоталитарен систем на управување.

 

Освен овие одговори, би било корисно, а секако и од интерес на јавноста, Димитров да открие што му пренесоа соговорниците во Берлин и Париз за очајните обиди на власта да ја заташка аферата Рекет. Или барем срамежливо да нафрли каков е ставот на највисоките владини претставници на Германија и Франција за вмешаноста на високи владини функционери во најголемата криминално-корупциска афера досега.

 

Конечно, оноа “чистење и реновирање на куќата” за кое пишува, да не се однесувало на укажувањата на Франција и Германија дека е неопходно прочистување, реновирање и дератизација за владиниот кабинет на Заев?

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.