Управниот суд ја прифати жалбата на Алијанса за Албанците и Алтернатива за резултатите од гласањето по листите за кандидатите за градоначалник и советници на Општина Дебар, за избирачко место број 0543, и таму ќе се изврши прегласување.

„Приговорот на Коалиција Алијанса за Албанците и Алтернатива од Тетово за повреда на постапката за гласање и сумирање на резултати предвидена со Изборниот законик, се уважува. Се поништуваат резулатите од гласањето по листите за кандидатите за градоначалник и советници на Општина Дебар, за избирачко место бр.0543 на Локални избори 2021 година“, стои во соопштението од Управниот суд.

Како што информираат, оспореното Решението на ДИК се поништува и се одлучува да се уважи приговорот на Коалиција Алијанса за Албанците и Алтернатива од Тетово за повреда на постапката за гласање и сумирање на резултати предвидена со Изборниот законик.

Одлуката се однесува на жалбата на АА и Алтернатива која бараше поништување на гласањето на ова избирачко место, што беше поддржано од членот на ДИК, Кренар Лога. Според Лога, записникот од Избирачкиот одбор е невалиден бидејќи не бил потпишан од мнозинството членови на ИО.

Исто така, беше наведено дека претседателот на Одборот на избирачкото место на денот на гласање бил разрешен од ОИК Дебар, но продолжил да ја врши функцијата.

На гласањето на 17-ти октомври кандидатот за градоначалник на Колаицијата Алијанса за Албанците и Алтернатива за малку не успеа да го освои мандатот во првиот круг со добиени 49,69 отсто од гласовите, пред Хекуран Дука од владејачката ДУИ кои освои 46,15 отсто од гласовите. Кандидатот на ДПА, Петрите Клења, пак, имаше 0,46 отсто од гласовите.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.