Претседателот на Владата на Република Македонија Димитар Ковачевски се сретна со Јон Еуген Гелштад, амбасадор на Норвешка за земјава.

На состанокот е разговарано за унапредување на соработката со Норвешка во областа на економијата, правосудството, одбраната – како држави партнери во НАТО.

Констатирано е дека пред светот и Европа се големи предизвици на планот на енергетиката и во прехранбениот сектор, поради војната во Украина.

На средбата е изразена поддршка за напредок на нашата држава во евроинтеграцискиот процес, како прашање од геостратешка важност за регионот и за Европа.

Премиерот Ковачевски соопшти дека тој и Владата се целосно посветени на поддршка на животниот стандард на граѓаните во државава и на развојна економија, дека земјата е определена кон негување на добрососедските односи исклучиво на база на принципиелност и на европските вредности, а дека надворешната политика поставена стопроцентно на линија на политиките на НАТО и на ЕУ.

Претседателот на Владата, Ковачевски, се заблагодари на амбасадорот Гелштад за искреното пријателство со Норвешка, како држава којашто го поддржа членството на Македонија во НАТО, којашто преку донации помага во реформските процеси во клучни области како што се правосудството, животната средина и одбраната и оцени дека е време да се унапредат трговските односи помеѓу двете земји.

Соопштено е дека во Македонија се гледаат потенцијали за инвестирање, при што е разговарано за можните области и начини на соработка.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.