За власта, а особено за Заев ова е последната сламка за спасот. И не е незаслужено затоа што народот е против него. Тоа е последица на многу разочарувања и неисполнети ветувања. На многу порази, на многу горки чувства и подголтнувања покрај малите екрани гледајќи ги неговите пазарења, скандали и афери. 5 години е на власт и најмалку 3 пати вели дека ја разбрал пораката од народот и повторно продолжува по старо. Токму затоа народот е во апатија, затоа што гледа дека таквото поведение не се менува. Сите жолти картони се потрошени, на ред е само црвениот. А тој овој пат е кај народот – изјави лидерот на ВМРО-ДПМНЕ, Христијан Мицкоски, во своето обраќање по повод празникот 23 Октомври, Денот на Македонската револуционерна борба.

Денеска во Долни Сарај во Охрид Мицкоски не го изостави прашањето со Бугарија, сметајќи дека не се работи за недостиг на разбирање од двете страни, туку недостиг на мудрост од македонската влада.

Сосема на кратко дозволете да се осврнам на прашањето со Бугарија. Потребно е да се издигнеме над облаците на измамите и пазарењата кои ни ги носи Владата со нашите соседи. И во тој контекст немаме право да ѝ се лутиме на Бугарија, бидејќи природно е тие да ги штитат своите интереси, она што навистина боли е што нашата држава ја водат луѓе кои се подготвени да прифатат сѐ, да се пазарат со сѐ. Не е во прашање на недостиг на разбирање од двете страни, туку недостиг на мудрост од македонската влада. Таквите притисоци кон членови на историската комисија и тоа од македонскиот државен врв водат кон кавга и лоши односи. Премиерот кога ги произведува тие ветувања кон Софија не се води од потребата за заштита на државните интереси, туку од потребата да си ја обезбеди фотелјата ден повеќе. Токму затоа се служи со измами кон соседите, но најважно таквите измами се кон сопствениот народ. Тој е еден човек кој е извор на стотина проблеми. Во тој контекст ќе го потсетам на резолуцијата на ВМРО која ова лето и тој ја прифати во македонското собрание. Таквите црвени линии го обврзуваат и неговото однесување кон овој спор кој пред 5 години воопшто не постоеше – рече Мицкоски

Тој вети дека ВМРО-ДПМНЕ ќе има искрен однос на почит и пријателство и секогаш пријателски пружена рака кон соседите, но со целосно право да ги заштити интересите важни за Македонија.

Треба да знае дека од наша страна како ВМРО-ДПМНЕ секогаш ќе најде поткрепа на тоа што преставуваат наши позиции за заштита на државните и национални интереси, но исто така е поважно да се заменат измамите со единство на кое повикувам, при што воедно треба да се приклучи и претседателот на државата, кој не е доволно да стои настрана и да се исклучува од овие проблеми. Ние како ВМРО-ДПМНЕ ќе имаме искрен однос на почит и пријателство и секогаш пријателски пружена рака кон соседите, но со целосно право да ги заштитиме интересите важни за Македонија. Тоа го кажувам јасно и отворено, наместо притисоци зад камерите и насмеани при изјавите пред камерите како што тоа го прави Заев, јас кажувам отворен став за соработка и почитување, но и одбрана на она во што веруваме – а тоа е реципроцитет, како тие нам, така ние ним. Ние односите со соседите ќе ги базираме на вредности на меѓусебна почит, толеранција и ќе ги надградуваме низ полињата на взаемен интерес на народите, и во нас секогаш треба да гледаат искрен пријател. Ние нема како Заев да пробуваме да ги вовлекуваме во некои непринципиелни односи, и да се служиме со измами и трикови притоа ветувајќи им се и сешто. Од нас може да имаат само искрен пријател и сосед со кој ќе работат на светла заедничка нова иднина за регионот – рече Мицкоски.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.