Пратеничката од редовите на ВМРО-ДПМНЕ, професорката д-р Гордана Силјановска Давкова, во вестите на „Сител“ зборуваше за потписите кои ВМРО-ДПМНЕ ги собира против законот за попис, како и за актуелните случувања во однос на мистериозно бегство и враќање на поранешниот директор на УБК, Сашо Мијалков.

Силјановска Давкова потенцираше дека ВМРО-ДПМНЕ има полн легитимитет да собира потписи против одреден закон, во овој случај лошиот закон за попис, бидејќи и начинот на неговото донесување и неговата реализација се лоши. Според неа за вакви прашања мора да има консензус, односно сите политички партии да дадат свои мислења и забелешки, но власта немала слух за барањата на другите политички партии, кои не се дел од парламентарното мнозинство.

ВМРО-ДПМНЕ поднесе многу амандмани кои беа во насока да се поправи законот за попис, односно да бидат имплементирани голем број забелешки кои што ќе придонесеа за многу подобар закон за попис, но парламентарното мнозинство не сакаше да соработува и своеглаво сакаше да истурка таков закон. Кога парламентарците не сакаат да послушаат други колеги парламентарци, тогаш ќе мора да го послушаат народот. Токму затоа ВМРО-ДПМНЕ отпочна со собирање потписи, кои засега се навистина во импозантен број – изјави Силјановска Давкова.

Таа истакна дека Република Македонија е категоризирана како земја во којашто владее хибриден режим и токму затоа голем дел од предлозите на ВМРО-ДПМНЕ не биле прифатени.

Силјановска додаде дека ВМРО-ДПМНЕ предложило да се набават апарати за фингер принт, со што пописот би добил многу повеќе на легитимитет и релевантност, но власта не е за таков чекор, бидејќи со користењето на такви апарати нема да може да се фингираат бројките како што власта ги замислила.

Пописот мора да биде статистичка операција којашто ќе обезбеди точни информации и бројки, бидејќи врз тие бројки се гради општеството и се сноси општествената грижа. За еден човек да биде попишан, мора да биде секојдневно тука, тоа значи да живее тука и да не е човек кој мигрира и не престојува долго време во Република Македонија. Тие луѓе не би требало да се попишуваат, бидејќи така голем број на села и градови ќе покажат дека имаат огромни населенија, а всушност се празни – заврши Силјановска Давкова.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.