Унгарскиот министер за надворешни работи Питер Сијарто денеска изјави дека доколку Европската унија не преземе навремени чекори во врска со проширувањето, може да го изгуби Западен Балкан, слично на Велика Британија.

На маргините на состанокот на министрите за прашања на ЕУ во Луксембург, Сијарто рече дека политиката на проширување е една од најважните политики на ЕУ, пренесува МТИ.

Според него, Унијата ќе води „политика спротивна на нејзините интереси“ доколку не ги забрза пристапните разговори со Србија и Црна Гора и го одложи почетокот на преговорите со Македонија и Албанија.

„Натпреварувањето за интеграција на Балканот и вршење влијание врз регионот е во тек. Иако ЕУ има најголеми шанси за победа, земјите од регионот го избраа европскиот пат. Трансатлантскиот правец на регионот не смее да се зема здраво за готово “, рече Сијарто.

Тој посочи дека на ЕУ и е потребен Западен Балкан повеќе, отколку што на Западен Балкан му е потребна Унијата и додаде дека загубата на тој регион може да биде реално сценарио за ЕУ ​​во случај на долгорочен ќорсокак.

Сијарто исто така рече дека Србија и Црна Гора треба брзо да се интегрираат, а преговорите со Албанија и Македонија треба да започнат наскоро.

„Ако не го стори тоа, ЕУ ризикува стабилност и безбедност во своето опкружување, наместо да има мир, смиреност и економски шанси“, потенцира Сијарто.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.